ការបំបៅដោះកូនមានអត្ថប្រយោជន៍សុខភាព សម្រាប់ទារក និង មាតា ជាច្រើន ដែលស្ត្រីភាគច្រើនមើលរំលង ។
អត្ថប្រយោជន៍សុខភាពសម្រាប់ទារកមាន៖
- កូឡូស្រូម (colostrum)៖ គឺជាទឹកដោះដំបូងដែលរាងកាយ ស្រ្តី បានបង្កើត ក្នុងរយះពេល ពីរ បី ថ្ងៃ ដំបូង បន្ទាប់ពីសំរាល ដែលមានពណ៌ លឿង ហើយ ខាប់ ។ កូឡូស្រ្តូមនេះ មានសារះសំខាន់ណាស់បងប្អូន កុំច្របាច់ចោលអោយសោះ គីប្រៀបដូចជា វាក់សាំង ដែលរាងកាយរបស់ មាតា បាន បង្កើតឡើងដើម្បើការពារទារកពីជំងឺផ្សេងក្នុងរយះពេល បី ខែដំបូង ។
- មានសារធាតុចិញ្ចឹមយ៉ាងពេញលេញ ៖ យោងតាមការស្រាវជ្រាវបង្ហាញថាទឹកដោះម្តាយ មានវីតាមីន សារធាតុរ៉ែ និង សារធាតុចិញ្ចឹម ជាច្រើន ផ្សេងៗទៀត ដែលទឹកដោះគោមិនមាន ។ សារធាតុទាំងនោះ មានសារសំខាន់ណាស់ ក្នុងការ អភិវឌ្ឍ ខួរក្បាល របស់ទារក ។
- ការពារកូនរបស់អ្នកពីជំងឺផ្សេងៗ ៖ គេសង្កេតឃើញទារកដែលបៅទឹកដោះម្ដាយមិនសូវកើតនៅជំងឺមួយចំនួនដូចជាជំងឺរាកឬក៏ក្អួតនោះឡើយ ។
- កាត់បន្ថយហានិភ័យនៃ ជំងឺនៅពេលដែល កូនអ្នកពេញវ័យ៖ ការបំបៅដោះកូនអាចកាត់បន្ថយហានិភ័យនៃ ជំងឺសរសៃឈាម ជំងឺបេះដូង ជំងឺ obesities (ហៅថា ជំងឺធាត់) នៅពេលដែល កូនអ្នកពេញវ័យ ។
- បង្កើននូវភាពស្និតស្នាល ៖ លើសពីនេះទៅទៀត ការបំបៅកូនដោយទឹកដោះម្តាយអាចបង្កើន នូវភាពស្និតស្នាល ដ៏រឹងមាំ រវាង ម្តាយ និង កូនរបស់អ្នក។
អត្ថប្រយោជន៍សុខភាពសម្រាប់មាតាមាន៖
មិនត្រឹមតែ ទារកទេដែលដែលទទួល បាននូវអត្ថប្រយោជន៍ សុខភាពនោះ លើសពីនេះទៅទៀត ការបំបៅកូនដោយទឹកដោះម្តាយ និង ពេលដែលរាងកាយ របស់ស្រ្តី ផលិតទឹកដោះ ក៏ មានអត្ថប្រយោជន៍សុខភាពសម្រាប់មាតា ជាច្រើនទៀតដែរ ដូចជា៖
- ធ្វើអោយស្បូនរបស់ ស្រ្តី ឆាប់រួម មកធម្មតាវិញបានលឿន៖ បន្ទាប់ពីសម្រាលកូន ស្បូនរបស់ស្រ្តីយើងនឹងរួមតូចជាងមុនបន្តិចម្តងៗពីមួយថ្ងៃទៅមួយថ្ងៃ ។ ប៉ុន្តែ គេបានសង្កេតឃើញស្ត្រីដែលបំបៅកូនដោយទឹកដោះ ស្បូនរបស់គាត់ រួម ឆាប់រហ័ស ជាង ស្ត្រីដែលបំបៅកូនដោយទឺកដោះគោ ។
- កាត់បន្ថយភាពតានតឹង( stress) ៖ នៅពេលដែលម្តាយបំបៅកូនដោយទឹកដោះ រាងកាយនឹងបញ្ចេញអរម៉ូនម្យ៉ាងហៅថា “អុកស៊ីតូស៊ីន” ដែលជួយឱ្យម្តាយមានអារម្មណ៍ស្ងប់ មិនសូវ មួម៉ៅ ច្រើន ។ អុកស៊ីតូស៊ីនត្រូវបានបង្ហាញថាជួយបង្កើន ឡើងនូវសុខុមាលភាពទូទៅ ធ្វើឱ្យស្ត្រី មានទំនុកចិត្ត មានការយល់ចិត្ត និង មាន ចិត្តសប្បុរស ។
- កាត់បន្ថយ នូវហានិភ័យនៃជំងឺមួយចំនួន ដូចជា ៖ ជំងឺមហារីកសុដន់ មហារីកអូវែ ជំងីពុកឆ្អឹង (ឆ្អឹងខ្សោយ) ជំងឺទឹកនោមផ្អែម និង ជំងឺសរសៃឈាមបេះដូង ជាដើម ។
ទឹកដោះម្តាយមានអត្ថប្រយោជន៍សុខភាព ជាច្រើនសម្រាប់ទារក និង ម្តាយ ហើយមិនបាច់ចំណាយថវិការ ដើម្បីទិញ ឡើយ ។ ចេញពេលណា ក៏បាន មិនពិបាកលាយ រឺ ឆុងឡើយ ។
ដូច្នេះខ្ញុំសង្ឃឹម ថា បងប្នូន ស្រ្តីយើង គ្រប់ៗគ្នា ក្រោយពីបានទទួល ពត៌មានសុខភាព នេះហើយ សូម គិតពី សុខភាព របស់បុត្រា បុត្រី របស់ខ្លួនជាចំបង ហើយ ជ្រើសរើសយកការបំបៅកូនដោយទឹកដោះម្តាយ ។
ជាចុងក្រោយនេះខ្ញុំសូមជូនពរឱ្យ បងប្អូនទាំងអស់គ្នា មានសុខភាពល្អ ។
